«
» في منزل كارما الشرقاوي .. أفضل موهبة «صولو» في مصر
كارما: ماما و«مس وفاء» .. اكتشفوا جمال صوتي وانا في «كي جي»
أنا في انتظارك أول أغنية غنيتها في الأوبرا .. وفزت بالجايزة بـ «شنطة سفر»
حوار – ثناء القطيفي:
كارما .. وهبها الله الصوت الموسيقي وأدهشت أسرتها منذ طفولتها بتمكنها من أداء الأغنيات القديمة لمطربي زمن الفن الجميل، مثل أم كلثوم وفيروز وغيرهما، فسعى أهلها لتمكينها أكثر بإتاحة الفرص لها للتدريب على الغناء.
“كارما الشرقاوي”، طفلة ذكية تتميز بحسها الفني منذ نعومة أظافرها، ومؤخراً فازت بجائزة أفضل صولو في مصر، ومن أجل ذلك احتفلنا بها وزرناها في بيتها.
تقول كارما في حوار لـ «»، إنها لم تكن تعرف أن صوتها جميل أو مميز، إلا أنها كانت تحب سماع الموسيقى والأغنيات القديمة، وكانت تتغنى مع أم كلثوم معلقة: “كنت بدندن بأغاني زمان وأهلي كانوا بيفرحوا بيا ومس وفاء وأنا فى الكي جى وقالوا لي صوتك حلو”.
البداية في حفلات المدرسة
وتتابع ذات الـ 12 عاما، الطالبة في الصف الأول الإعدادي، أنها شغوفة بالغناء، لافتة إلى تمكنها في الغناء بنبرة صوتها القوية منذ 4 سنوات، وتقول: كنت باغني لأم كلثوم وأنغام وماما لقت صوتي قوي خدتني أتدرب في الأوبرا”.
ونسألها: متى وكيف اكتشفت موهبتك؟
وترد: أنا كنت دايما باسمع أغاني زي فيروز وأم كلثوم وماما لاحظت دا وكانت على طول بتجيب لي الأغاني دي، وماما اللي اكتشفت ده والكلام ده كان قبل ما ادخل الحضانة، ولما دخلت الحضانة «مس وفاء درویش» قالت لمامتي إن أنا صوتي حلو مش زي اللي فى سني ولازم أروح الاوبرا
* ورحتي فعلا أوبرا؟
– أيوه فعلا روحت وانا في Kg2 وأول ما دكتور عمر حسن المدرب اللي كان موجود وقتها سمعني قرر إن هو يخليني «سولو» في الحفلة وغنيت فيها سهر الليالي لفيروز.
* وإيه أول أغنية كانت سبب في شهرتك؟
– أغنيه أنا في انتظارك لأم كلثوم تدريب المايسترو إيهاب مبروك مايسترو فرقة البحيرة القومية للموسيقى العربية وكان ليه دور كبير جداً في تدريبى إن أنا أتقدم بسرعة فى الغنا وأحب أوجه له الشكر.
* انتٍ بتغني في الأوبرا وكل أغانيكى قديمة .. ياترى بتغني أغاني جديده؟
– أيوه باغني أغاني قديمة وجديدة مش شرط قديمة بس
* ياترى انتٍ شاطرة في المذاكرة زي ما انت شاطرة في الموسيقى؟
– الحمد لله وأنا ماكنتش باخد دروس السنين اللي فاتت كلها والحمد لله درجاتي كانت حلوة جدا
* اشتركتى فى مسابقات قبل كده؟
– اشتركت في مسابقة Alex got talent وكان عدد المشتركين فيها أكثر من ألف مشترك وكنت من ضمن العشرة الأوائل اللى وصلوا للنهائي، واشتركت في مسابقة الموهوبين والتعلم الذكي بوزارة التربية والتعليم وكنت ساعتها في تانيه ابتدائي وكان المتقدم في المسابقه تقريبا ٢٠٠ متسابق ووصلت للنهائي وكانت الجائزة إننا نعمل عرض قدام المحافظ.
واخر مسابقه اشتركت فيها كانت مسابقة كنوز مصرية بفريق وزارة الشباب والرياضة، واشتركت فيها فرق من جميع المحافظات، والحمد لله طلعت أول صولو على مستوى الجمهورية، بقيادة وتدريب المايسترو أحمد الرياني اللي له كل الفضل في فوزي بعد ربنا سبحانه وتعالى، وطبعا فوز فريقي بالمركز الأول على مستوى الجمهورية للسنة الخامسه على التوالي، واتكرمت من وزير الشباب والرياضه الدكتور اشرف صبحي وعملت عرض قدامه في ختام المسابقه مع الفنان عماد كمال بمسرح وزارة الشباب والرياضه في القاهرة.
* وايه الأغنية اللي كسبتي بيها مسابقة كنوز مصرية ؟
– شنطة سفر لأنغام
* منضمة لأي فرق غنائية؟
– منضمة لفرقه the cats 4 معايا ثلاث بنات صحابي أنا و فریده وروان وبهار بقيادة المايسترو إيهاب مبروك ، وفريق الكيان بقيادة المايسترو أحمد الرياني.
* فى أخر الحوار .. تحبى تقولى لمين شكراً
– أحب أشكر ماما وبابا علي دعمهم ليا، ومجهودهم معايا في تنمية موهبتي وأحب أشكر كل عيلتي واصحابي على تشجيعهم ليا وباشكر كل مدربيني على تعبهم معايا وإيمانهم بموهبتي.
