![](https://alkhabrlive.com/wp-content/uploads/2023/05/IMG-20230512-WA0090.jpg)
يضم ٤ آلاف عدودة .. “غُنا الحزانَى” كتاب جديد يرصد سيموفونيات الحزن الخالدة في الصعيد
كتب – مصطفى عبدالرحمن :
يصدر قريبا كتاب (غُنا الحزانَى).. ويعد الكتاب الأهم فى فن العديد، للشاعر القنائى المعروف عادل صابر.
الإصدارالذى يحتوى على أكثر من أربعة آلاف عدّودة قام الشاعر الكبير بجمعها من محافظات ومراكز وقرى ونجوع مختلفة، منها على سبيل المثال قرى الدير والمحروسة، دندرة ، قامولا ، العربات ، العليقات ، ” حميدة الحلبية بقرية كوم الضبع .. ” جرجا وبرديس بسوهاج ” ، دراو بأسوان ، الحجيرات والسمطة بقنا ، بالإضافة إلى حوالى ألف عدودة قد جمعها من والدته رحمها الله، وهى التى يفخر الشاعر أن يهدى إليها هذا الكتاب المهم، والذى يتنظره آلاف القرّاء.
ويقول الشاعر عادل صابر، إن فن العديد هو ثمار أشجار الحزن الذى نما وترعرع فى قلوبنا بعد أن رويناه بدموعنا على الراحلين من الأهل والخلاّن والأصدقاء .. موضحا أن العديد فن شعبى خالد خلود الموت والأحزان، وكلما أوغلت فى الجنوب كلما ازدادت العدودة قوةً ورصانة وكلما كثرت طقوس الحزن وطال أمدها.
أوضح أن العدودة الواحدة تتكون من بيتين من الشعر أو أربعة أغصان كل غصنين منهما بحرفى روي متشابهة، تبدأ النائحة بالغصن الأول وتكاد تصل إلى منتصفه حتى يكملن النساء وراءها باقى الأغصان بمصاحبتها وتختلط الأصوات المبحوحة الحزينة معاً لتصنع سيمفونية من أروع سيمفونيات الحزن الخالدة.
وأضاف أن فن العديد ينقسم إلى أغراض متنوعة تقال وفقاً لنوعية الراحلين من حيث السن والجنس والقيمة الاجتماعية ونوع الميتة التى لقيها الراحل، فمنها ما يقال عن الشباب وكبير السن والرجل والمرأة واليتيم والغريب والغريق والقتيل وقليل الخليفة وأحوال القبر والغاسل والفحّار وأغراض متعددة .
وقال الشاعر عادل صابر، إن كتاب (غُنا الحزانَى) جمع فيه أربعة آلاف عدودة من جميع محافظات وأقاليم الصعيد ومنهم ألف عدودة من أمه لوحدها .. مضيفا: يمكنني أن أزعم بكل شجاعة إننى لم أغادر عدودة واحدة لم أجمعها فى كتابى ولم أترك شيئاً لمن يأتى بعدى من جامعى العدودة والله ولى التوفيق.
و تقدم بعض النماذج التى تخص بعضاً من أغراض هذا الفن الخالد.
نماذج من العدودة عن المريض :-
والله الوجيعة حنضلة مرة
وتخبِّل الشملول مع الحرة
والله الوجيعة حنضلة فى منديل
من داقها حِرِم عليه الليل
ـــــــــ
دخل الطبيب مدّوا اياديهم
قال الطبيب معاييش دوا ليهم
دخل الطبيب دخلت قدامه
قال ياشقية خِلصِت ايامه
ـــــــــ
زرنا المشايخ والقِباب البيض
مالقيت لكم ياموجعين طبيب
زرنا المشايخ والقِباب سوا
مالقيت لكم ياموجعين دوا
ـــــــــــــــــــــــــــــــــــــــــ
عن القبر :-
راحوا يقولوا غيرتنا يارديم
كنا على الدنيا شباب عايقين
راحوا يقولوا غيرتنا ياتراب
كنا على الدنيا شباب عيّاق
ـــــ
ياقبر سيّبنى وخُد شالى
أفنس على عيالى واجيك تانى
ياقبر سيّبنى وخُد الشال
أفنس على عيالى واجيك قوام
ياقبر سيّبنى وخُد الشُقة
افنس على عيالى واجيك بكرة
ـــــــــ
حصْو الجبل ياختى وجع راسى
كان خاطرى فى نومة على فراشى
حصْو الجبل ياختى وجع ضهرى
كان خاطرى فى نومة على فرشى
ــــــــــ
ولايعجبك قبرى وتزويقه
من فوق براح وتحت ياضيقه!!
ولايعجبك قبرى ولا رخامه
من فوق براح وتحت ياضلامه !!
ـــــــــــ
والله الفساقى طابقة وشينة
عايزة الهوا والبخ فى القيلة
والله الفساقى طابقة ياولاد
عايز الهوا والقعاد ع الباب
*****************
عن اليتيم :-
***************
حِلّى شعورك واعمليه خيمة
ربِّى بناتك واحملى الميلة
حِلِّى شعورك واعمليه ضلّة
ربّى بناتك واحملى الذِلّة
ـــــــ
والله اليتيم شال التراب كلّه
مين قال يابايا غاير منه
والله اليتيم شال التراب كلّيه
من قال يابايا غاير منيه
ــــــــــــ
بكى اليتيم واتلطع فى الحيط
قال بختكم يابواتكم فى البيت
بكى اليتيم واتلطع برة
قال بختكم يابواتكم جوه
ـــــــــــ
قعد اليتيم فى ضل لبلابة
نفسه ذليلة ، يقول لمين يابا
لكان اليتيم شاشه دهب منتور
برضه يتيم وخاطره مكسور
********
عن كبير العائلة الراحل :-
وحش الجبل ياولاد مين جابه
هو عطش ولاخلص زاده
وحش الجبل ياولاد مين دلاّه
هو عطش ولا خلص مرعاه
ـــــــــــ
راجل مليح طالع من الملقة
تعاود الرجّال بس ان جه
راجل مليح طالع من الحارة
تعاود الرجّال ياخسارة
ــــــــــــ
خطوا دراع السبع فوق بابه
وان صار غايب إحسبه حسابه
خطوا دراع السبع فوق الباب
وان كان غايب إحسبوله حساب
ــــــــــــــــ
يامين رعاله جاى من قبلى
يقول للعيال المايلة اتعدلى
يامين رعاله جاى من شرقة
راكب الكحيلة والركاب فضة
ـــــــــــــــ
يامين رعاله جاى من بحرى
راكب الكحيلة والركاب يضوى
**********
عن الأب الراحل:-
طالع مغرِّب ياغفير هاته
إحلف عليه عاوده لعويلاته
طالع مغرِّب ياغفير ردُّه
جدع صغيّر رجّعه لوِلْدُه
ــــــــــــ
طالع مغرِّب ياغفير هاته
شاله الحرير ع المغسلة فاته
طالع مغرِّب ياغفير هاتيه
احلف عليه وعاوده لدراريه
ـــــــــــــ
طالع يابايا وانا وراك أنوُح
يابوى ورّينى الحدودِ وروُح
طالع يابايا وانا وراك ابكى
يابوى ورّينى الحدود وامشى
طالع يابوى وانا وراك اطير
يابوى ورّينى حدود الطين
**********
عن الأم الراحلة :-
وانا داخلة والباب خَد راسى
فين الحبيبة اللى تقول طاطى
وانا داخلة والباب خَد وشِّى
فين الحبيبة اللى تقول خشِّى
ــــــــــــــــ
انتى ياشابة ياشايلة الجرة
قولى لأمى بنيّتك برّة
انتى ياشابة يالابسة القبقاب
قولى لأمى بنيّتك ع الباب
ــــــــــ
ماتطلعوها من بيتها العمران
هية الجنينة وولادها الرمان
ماتطلعوها من بيتها العامر
هية الجنينة وولادها التامر
ــــــــــ
درْت البلد والمشط فى راسى
درت البلد مالقيت عوضهاشى
درت البلد والمشط فى شعرى
درت البلد مالقيت عواض امى
ـــــــــ
ياما قعدنا على حصير اخضر
نتحدّتوا لما النجوم تظهر
ياما قعدنا على حصير وقياس
نتحدتوا لما تنام الناس
*********
عن الشابة الراحلة :-
والله الفساقى ماتعرف الصورة
ولاتعرف القُصّة على القورة
والله الفساقى ماتعرف الواجب
ولاتعرف القُصّة على الحاجب
ــــــــــ
بين القبور لابير ولا ميضة
ولاساقية تسبَّح البيضا
بين القبور لابير ولاجنينة
ولاساقية تسبَّح الزينة
**********
عن الشاب الراحل :-
ع الموردة جديِّع بيصيَّر
ياامة غدرنى الموت وانا صغيّر
ع الموردة جديِّع بيطوّح
صعبان عليّ قال له الطبيب روّح
ــــــــ
يالابسة الحزّون زيدى فروعه
على شبابه وقلةِ رْجوعه
يالابسة الحزون زيديه فرعين
على غلاوته وشبابه الزين
ـــــــــــ
محلا يمينه بكم فالينة
شايلاك للعازة خليت بينا
محلا يمينه بكم قطنيّة
شايلاك للعازة خليت بيا
ــــــــ
حق النبى ماصاحّة منك
كنت دفنت الوالدة قبلك
حق النبى ماصاحّة منّيك
كنت دفنت الوالدة قبليك
**********
عن الطفل الراحل:-
ريت العيال يلعبوا بالبوص
لابسين طواقى وحالقين الروس
ريت العيال يلعبوا بقصب
لابسين طواقى وحالقين عجب
ـــــــــ
ياريتنى علّمت منديله
وسْط العيال واعرف تماتيله
ياريتنى علّمت محرمته
وسط العيال واعرف بياض وشه
ــــــــــــ
اسم الله عليك ياسمن فى قلة
غالى عليا رباية الكُلّة
اسم الله عليك ياسمن فى قليْلة
غالى عليا رباية العيلة
ـــــــــ
دبدب رجالاته على العتبة
يابيت ابوى ماعدت اجيك أبَدة
دبدب رجالاته على الحاصل
يابيت ابوى ماعدت اجيك واصل
ــــــــــ
خيبة قوية وجاتها خيبة
وخيبة قوية لوطالت الغيبة
ولا تنزّلونى القبر ابو عقرب
كله ضلام ولا فيه عيال تلعب
ولاتنزلونى القبر ابو سلّوم
كله ضلام ولافيه عيِّلة تقوم
********
عن قليل الخليفة :-
لاروح الجوامع واسألك ياخطيب
أنهى بنات تقعد بلا اخ شقيق؟!
لاروح الجوامع واسأل الخُطَبا
أنهى بنات تقعد بلا شُقَقَا؟!
ــــــــ
بيت الجدع خلّوه مكَب وقيد
يقعد خراب لما يبان له سيد
بيت الجدع خلّوه مكَب تراب
يقعد خراب لما يبان له صحاب
ياحسرة ع الخايب يعيش خايب
يطلع من الدنيا بلا نايب
*********
عن الغريب الراحل :-
دا قبر مين اللى البقر داسه
قبر الغريب اللى فاتوه ناسه
دا قبر مين اللى البقر دكُّه
قبر الغريب اللى فاتوه اهله
ـــــــــــ
بت البحيرة فانسة م العالى
يابِد على أهله عزيز غالى
بكى الغريب وقال ياراسى
علّوا المخدة وابعتوا لناسى
ــــــــــــ
بكى الغريب وقال ياقلبى
علّوا المخدة وابعتوا لأهلى
حااكريلهم قارب يكون نحاس
يجيب الغرابا من بلاد الناس
ـــــــــ
حااكريلهم قارب يكون حديد
يجيب الغرابا من بلاد بعيد
يابلاد بحرى ماتميلى ميل
خلّى الحبايب يلتقوا بالعين
يابلاد بحرى ماتميلى ميل
لمّى الغرابا من ضلام الليل
********
عن القتيل :-
ولْد الحرام اوعى تلاقيهم
معاهم رصاص مالى مخاليهم
ولْد الحرام اوعى تصادفهم
معاهم رصاص مالى مكاعبهم
ــــــــــــ
ياما قلتلك ع الجسر لاتمشى
إبن الحرام يضرب ولا يرخى
خلفت الطريق ومشيت فى الوحلة
لقيت المقدّر غالب القسمة
ـــــــــ
خلفت الطريق ومشيت فى الجرجوب
لقيت المقدّر غالب المكتوب
اتنين وراه واتنين ورا النخلة
واتنين يقولوا خدوه فى الغفلة
ـــــــــ
اتنين وراه واتنين قدّامه
واتنين يقولوا ادّوه فى حزامه
ياساعةٍ لفّوا عليه داير
بقى الجدع بين الرجال حاير
ياساعةٍ لفّوا عليه دوّار
بقى الجدع بين الرجال محتار