خدوا مني بناتى ومليش غيرهم .. أرملة تستغيث من أهل زوجها بالبحيرة
كتبت ـ ثناء القطيفى
عايزة اشوف بناتى حرمنى منهم بعد وفاة زوجى بقالهم 3 شهور بعيد عني استغاثت سيدة مقيمة في محافظة البحيرة، من أسرة زوجها المتوفى التي حرمتها من بناتها التوأم عقب وفاة زوجها في حادث في يوم 17 ديسمبر 2023.
وقالت إنها قضت شهور العدة في المنزل عقب وفاة زوجها، وبعد انتهائها طلبت من حماها أن تذهب لزيارة أسرتها لأن حالتها النفسية كانت سيئة.
وتابعت: طلبت من حمايا أروح أزور أهلي لأني مخنوقة ونفسيتي تعبانة، قالي روحي لوحدك من غير العيال ولو خرجتي بيهم هعملك محضر سوء سلوك، عم زوجي تدخل ووداني عند أهلي بالعيال وقالي يومين وهجيبك، بعدها بيومين كلموني وقالولي حماتك بترمي هدومك وحاجتك من الشباك، خدوا مني عيالي وحرموني منهم وهما بنتين تؤام لسه صغيرين.
وأضافت أنها لم تر ابنتيها منذ فترة طويلة، حيث أن أسرة زوجها منعوها من رؤيتهما خلال شهر رمضان وفي عيد الفطر المبارك، معلقة: في رمضان كنت بقعد على الفطار مبقدرش آكل لأن عيالي مش جنبي، نزلت اشتريت لهم لبس العيد وفي الآخر أقعد أتفرج على اللبس لوحدي من غير عيالي.
وأوضحت أنها حصلت على حكم من المحكمة بحضانة ابنتيها التؤام، إلا أن أسرة زوجها المتوفي دائمًا ما يتهربون وقت تنفيذ الحكم، قائلة: حرقوا قلبي على ضنايا وبياخدوا العيال ويهربوا بيهم ويخبوهم عشان مقدرش أنفذ الحكم وأخدهم يعيشوا معايا.
واختتمت حديثها: مش كفاية إن العيال اتحرموا من أبوهم هيحرموهم من أمهم كمان، كل يوم أنام دمعتي على خدي خايفة يكون عيالي نسيوني، في كل سجدة بدعي ربنا يرجعوا حضني عشان مليش غيرهم.
