تصريحات الفنانة عبلة كامل للإعلامية لميس الحديدى.. تتصدر منصات التواصل
تصدرت المداخلة الهاتفية للنجمة عبلة كامل مع الإعلامية لميس الحديدى منصات التواصل الاجتماعى..وتفاعل معها جمهور ومحبى الفنانة الكبيرة.
ننشر تصريحات عبلة مع لميس كاملة.
لميس الحديدي: في كل مرة بنكون عايزين نطمن على عبلة كامل بنتصل بها ونسألها على صحتها وبعدين نقول للمشاهدين اللي هي قالته ، المرة دي الحاجة عبلة كامل عملت لنا مفأجاة وحابة توجه رسالة صوتية بنفسها للجمهور تطمنا على صحتها خلينا نسمعها معاكم .
عبلة كامل : لميس، أنا متشكّرة جدًا ليكي وللقائمين على البرنامج إنكم سمحتوا لي بالرسالة دي ، وطبعًا أحب أشكر السيد رئيس الجمهورية على قراره بعلاج الفنانين.
الحقيقة أنا اتفاجئت بالقرار وسعدت بيه جدًا، ودي لفتة هايلة وحنونة منه.
أنا بس عايزة أطمن الناس اللي أنا بحبهم وبيحبوني، إنه أنا الحمد لله كويسة وبخير. كنت عملت عمليات قبل كده، بس أنا الحمد لله بقيت كويسة. والعمليات دي كانت على نفقتي الخاصة، الحمد لله أنا مش محتاجة حاجة، وإن شاء الله كلنا كده على بعضنا نبقى أصحاء ومش محتاجين أي حاجة.
هو بس أنا بشكر كل الناس اللي دعوا لي، وبقول لهم إن شاء الله الملايكة يردوا عليهم ويقولوا لهم: “ولكم بمثلها.”
وليَّ عتاب على الناس اللي أنا بحبهم جدًا برضه، اللي هم قالوا: “يعني هي عبلة كامل محتاجة فلوس؟ ومحتاجة علاج؟ مش لازم تتعالج؟”رفقًا بالقلوب، على العموم أنا مسامحة و كلنا بقى مسامحين بعض، وإن شاء الله كده يعني كلنا نبقى كويسين.
وأحب بس أقول حاجة: إنه أنا ما عنديش أي صفحات بإسمي على النت ومش هيبقى عندي صفحة لغاية ما أقابل وجه كريم إن شاء الله ، أنا دايرتي مغلقة جدًا وقافلة على نفسي، واللي حواليّا كمان، يعني كلنا دايرتنا مغلقة علينا ، فأي تصريح بيبقى مش عن لساني ولا لسان اللي حواليّا مش هيكون صحيح.
وبشكركم مرة تانية وإن شاء الله كلنا نبقى بخير. ولا إله إلا الله محمد رسول الله.
