قصيدة جديدة للشاعر / أحمد شافعي: «لسة عايش»

برغم إني لسه عايش بقاوح في الحياة. وبرغم إن كان لي ألف حلم جميل وتاه. لكن مازال عندي الأمل ألقى سفينة للنجاة. إني أوصل لبر يمكن يكون بداية لعمر تاني. عُمْر أزرعه بالحنين ألقاه طرح حبة أماني. عُمْر أحقق فيه لذاتي أي حاجة تكون عشاني. أصنع لنفسي أي مجد إن شالله حتي في الأغاني. مش كفاية عشت تايه ماليش هدف وماليش قرار. حياة بحالها مرّت عليا ماشفتش عيني فـ يوم عَمار! كأن قلبي اللي خربته مابقاش يحب إلا الدمار! إن مر يوم من غير جراح أقول خلاص قامت القيامة. وإن حصل لي أي داهية أقول إيه يعني، مع السلامة! هايفرق إيه مع الحياة رحيل جسد مالوش علامة! إنسان تملّي يسيب طموحه مع كل طلعة للنهار. يخلق لنفسه ألف عذر للمهانة وللمرار. عمل عقود حتي الممات ويّا حالة الإنكسار. هايجرى إيه لو للحظة روحي حسّت بالسعادة. عشتلي ساعتين هنا ومعاهم بس يومين زوادة. لكن إتضح إن المشاعر في الأساس واخداها عادة. احلم بفرح هاتلقى فرح احلم بموت هاتموت زيادة!!