الرئيس يشيد ب"قطايف"سامح حسين

أشاد الرئيس عبد الفتاح السيسي خلال الحفل السنوي للإفطار الذي أقامته القوات المسلحة المصرية ببرنامج الفنان سامح حسين "قطايف". وعبر السيسي عن تقديره للمحتوى الذي يقدمه البرنامج. وقال الرئيس: "حلينا بقى بعد الأكل، وربنا يوفقك وكل سنة وأنتم طيبين، طولنا عليكم وحبينا نحلي في الآخر بجملة من سامح عشان برضو أقول للمعنيين بالأمر: المجتمع بيقوم على البيت، وبيقوم على الإعلام، وبيقوم على الناس، والمسجد والكنيسة، وبيقوم على التعليم، ولو في حاجة فاتتني قولولي". وأضاف الرئيس السيسي: "أي مجتمع عاوز يتطمن على ركائز ثبات وقوة مجتمعه وقدرته على الصمود، يا ترى الخمس عناصر دول موقفهم إيه؟ مع الوضع في الاعتبار إنهم بيأثروا على بعض. المدرسة والجامعة بتأثر على البيت، والتنشئة بتأثر على الجامع والكنيسة بخطابهم، بيأثروا على الشخصية. والإعلام واللي بيقدمه يبقى صوتنا عالي، وإيدينا دائماً. مش بهاجم حد، دي بلدكم ودا مجتمعكم، بتعلموهم إيه؟". وتابع الرئيس : "هو مش فيه جامعات فيها أساتذة علم نفس واجتماع يقولولنا إيه الخلطة تبقى عاملة إزاي؟ الكلام دا يتاخد للمؤسسات الإعلامية المطلوبة، والناس اللي بتعمل دراما الناس تشتغل عليه. ولا إحنا الأمور مش كده، دي بلدنا ودا مجتمعنا ودول ولادنا ودي أسرنا، ودي قيمنا ودي أخلاقياتنا. مش هتكلم في المواضيع دي كتير، يقولك لا علشان الناس تزعل، ليه بنزعل من الحق؟ وسعيد إني ألتقي بيكم، كل سنة وأنتم طيبين". جاءت كلمات الرئيس السيسي خلال الحفل الذي جمع عدداً من قيادات القوات المسلحة والمسؤولين، حيث أكد على أهمية دور الأسرة والإعلام والمؤسسات التعليمية والدينية في بناء المجتمع والحفاظ على قيمه وأخلاقياته.