النهاردة عيد ميلاد أحمد زكي.
كتير بيعبتروه الأعظم على الإطلاق في تاريخ السينما المصرية.
بيشبه عبد الحليم في خمس حاجات.. انهم فلاحين من الشرقية.. وفي اليتم.. أحمد ماشافش أبوه وأمه اتجوزت وجده رباه.. وإن الاتنين جايين من بعيد جدا.. مش مسنودين على أصول باشوات زي حسين فهمي مثلا ولا طبقة أفندية .. رابع حاجة الاتنين عملوا ثورة في مقاييس الاغنية والتمثيل .. خامس حاجة في سر غامض ربط الاتنين بسعاد حسني.
احمد اتعلم في مدرسة الصنايع وكان لحام على ما أذكر وبسبب حبه للمسرح راح درس في الفنون المسرحية وطلع أول دفعته.. مع ذلك كان آخر واحد ياخد فرصته بين كل مواليد الأربعينيات .. مش بس عشان هو أصغرهم (م 1949) كمان لانه أسمر وشعره افريقي.
وبدأ صغير كومبارس تقريبا ولما اتحمست سعاد حسني إنه يلعب بطولة شفيقة ومتولي قدامها المنتج قالها الاسود دا
بكتيره يطلع جرسون في مشهد
بكتيره يطلع جرسون في مشهدأحمد قلب الطاولة على كل نجوم جيله وسبقهم كلهم.. وأتفه أفلامه كان ليها قيمة بوجوده.. ولما أصبح الممثل رقم واحد في مصر كان أول الراحلين من أبناء جيله
صعب اختزال موهبته في التمثيل بس هو كان الحصان الجامح لكل المخرجين الكبار اللي عاصروه.. وهزم نموذج الوسامة التركي الهوليوودي … وكان ممثل بيحترم الصمت في بناء شخصيته .. مش بيسمع كلام .. وما عندوش «أفورة» المسرح .. فأداؤه أقرب للحياة زي ما هي بالضبط .. وعنده جيشان عاطفي غير طبيعي في تعبيرات وجهه.
أحمد زكي ودينزل واشنطن نفس القماشة بالنسبة لي .. مش بس بسبب الجذر الإفريقي في الملامح .. كمان القدرة الرهيبة على أداء أي دور بنفس العظمة .. ومش ببالغ إن أحمد كمان يمتاز بهزلية مش عند دينزل .. والغناء كمان.
