«لقمة عيش».. نص شعري جديد للشاعر محمد الساعي

صراع الإنسان مع الواقع والأحلام

طرح الشاعر الكبير محمد الساعي نصًا شعريًا جديدًا بعنوان «لقمة عيش»، تناول خلاله عددًا من المشاعر والأفكار المرتبطة بصراع الإنسان مع الواقع، وما يواجهه من ضغوط وخيبات وأحلام تصطدم أحيانًا بظروف الحياة.

ويعتمد الساعي في النص على لغة شعرية تجمع بين التعبير المباشر والصور الرمزية، لينتقل بين الحديث عن الحلم والخذلان والخوف والخيانة، وصولًا إلى البحث عن أبسط الاحتياجات، وهي «لقمة العيش».

ويقول محمد الساعي في نصه:

لقمة عيش

من مافيش... للمافيش

طيش بيرسم خطوتك توصل.. لـ طيش

حلمك اللي حلمت بيه..

مرسوم على ضهر الأفيش

كومبارس صامت متهم..

والبطوله.. للشاويش

قضيت حياتك كلها تكتب كلام..

ما بيتقريش

صوتك سكوت..

قلبك تابوت..

والعنكبوت.. عشش في عقلك خلا فكرك..

بالريموت / وحباله خيش

ومايساويش..

كل اللي كان في عنيك أمل..

أصبح سراب

كداب بيغزل كدبته.. ف تطلعه فوق السحاب

وف لحظة يبقى ع التراب

وصحاب وشوشها في الخفا..

أنياب

ورا كل باب..

متنتورين

سانين خناجرهم ومنتظرين..

لحظة خيانه مُقَنَّعه..

متمنعه الأيام تجاوبك ع السؤال المنتظر

طب ليه؟!..

وإيه معنى الخطر..

وازاي بييجي من الأمان

ملعون يا من جعل الخطر..

إنسان

ملعونه كلمه بتتكتب..

مالهاش مكان ..

غير وسط دخان الحشيش

واهو كله دايما..

أكل عيش

تناتيش حياتك كلها ..

من مهدها لمَّن بتوصل لحدها..

تناتيش

مجبور على مواجهة خيالك

مغصوب تكتف خطوتك ..

تكبح خيالك

واللي في بالك ..

محض فكره وامتعاض

ممنوع تبيِّن أي لحظة إعتراض

لتروح في لحظه وبعدها ..

ماتجيش

إياك تحن وتبقى يوم ..

درويش

درويش زمان..

مابقاش خلاص درويش

بشويش..

بينزع خرقته

وف لحظة غيَّر حرفته

مابقاش أسير لعبايتك الخضره

مابقاش خلاص بيجهز الحضره

ما بقاش بيحلم غير..

بلقمة عيش

محمد الساعي